दय नो दूर सु छु जायि जायि मंज़ वूछ ।

यथ छु नज़दीक अछिनई बायि मंज़ वूछ ।।

जनिसई मंज वुछ छुय नार ईथह पाठय,

मांजे मंज वुछू वोज़जार इथह पाठ्य,

अछरन मंज़ छुय आकार इथह पाठ्य।

यार इथह पाठ्य पनि कायायि मंज़ वूछ ।।

शीनस मंज वुछ छुय जल इथह पाठ्य,

बलियस मंज वुछ छुय बल इथह पाठ्य,

थलि थलि वूछ छ य कीवल इथह पाठ्य ।

शीव निर्मल हृदयि गोफायि मंज़ वुछ ।

नावह-रूपह कुय पर्दह तुलिथई छु य नोन,

शास्त्रनई-वीदव संतब वोन,

असिति वोनय असिति पानस वूछ नो ब्योन ।

मूड नो ज़ानि सु अविद्यायि मंज़ बुछ ।।

असिति-भाति प्रेयि रूपह जान दय कुल,

सुय-लंग लंजि छुय मेवह मुशुक तय गुल,

सुय बे रंग रंगह रंगह छोत तय वोजुल ।

सुय बुलबुल बोलान मायि मंज़ वुछ ।।

गुणियन मंज़ वुछ छुय गुण इथह पाठ्य, 

भूशणनई मंज़ छुय स्वन इथह पाठय,

आकाश मंज वन भूतन इथय पाठ्य ।

शब्द इथह पाठय छुय नायि मंज़ वुछ ।।

आलमई त्येलि नय ओस जामुतुय,

सिरयि चन्द्रमह त्येलि नय ओस द्रामुतुय

वीद शास्त्र त्येलि नय ओस आमुतुय

ओस गोवन्द तथ्य अवस्थायि मज़ वुछ