ज्योन मरुनुय भ्रम यि जगत लो लो,

अमर पानह छुख च सतचित लो लो।

बेचि क्या म्य मेचि स्यीत मेलुन,

मेनि छारान म्य ने कुनि नों वुछुम ब्यन ।

सुय ब्रोंठकुन सुय ओस पत लो लो,

अमर पानह छुख च सतचित लो लो ।।

आप सहित सर्वं जाने जो हरे,

सुय तरे रिन्दह जिन्दय मरे ।

सबसे परे ज़ानि यि कथ लो लों,

अमर पानह छूख च सतचित लो लो ।।

इय जानहनस मंज़ इवान तिय छु छोचय,

जाननुक जानुन पानय मोचूय ।

अभोक्ता छुख ख्यत च्यत लो लो,

अमर पानह छुख च सतचित लो लो।

दय घरे करे युस सरय पान,

कोर रिन्दव ज़िन्दय द्राग्व अरमान ।

छाँडखय दय यि छय वथ लो लो,

अमर पानह छुख च सतचित लो लो ।।

हरीहरह होवथम हरमुखह मुख,

दुख दूर गयि सुख रूपह छुख सन्मुख ।

चानि प्रयमह हेयम यम पोत लो लो,

अमर पानह छुख च सतचित लो लो ।।

ज्ञञानह गंगायि मंज़ यूगी त सतजन,

तरन भवहसरह तन मन छि नावन ।

चति तर सतसंगह नावि लो लो,

अमर पानह छुख च सतचित लो लो ।।

कर च चन्द्रायन चाप्य चापी,

केंह बनान पंच अगन ताप्य तापी ।

व्रत सारिय दर्य दर्य नित लो लो,

अमर पानह छुख च सतचित लो लो ।

इय अनुभव वीद संत छिय वनान,

आत्मह ज्ञानह व्यचारह रोस्त न मिटान ।

वासना दिवन अतह गत लो लो,

अमर पानह छुख च सतचित लो लो॥

अज़रह अमरह पान इनह मशी जाह,

सहम सू ओम तत सत लो लो,

शाहन जान थव छुख ना शाहनशाह।

अमर पानह छुख च सतचित लो लो

सोरुय चई चई साक्षी सारिकय,

जान मो ज़ई दुय गाल पथ छ्य सूय।

न चई बुय न छि खलकत लो लो,

अमर पानह छुख च सतचित लो लो।

अन्ननुई अन्दर ओम वुछनई सोर

पचनई दय ह्यरि बोनह नचनूई कर।

मोचि नादहब्यन्द ज्योति कोर गत लो लो,

अमर पानह छख च सतचित लो लो ।।

परि पूरण सतचित आनन्दघन्न,

केंह न तस व्यन हनि हनि सू न्यूनम मन।

नारायणह चानी म्य सत लो लो,

अमर पानह छुख च सतचित लो लो ।।

सतचित आनन्दह चोनुई स्वभावई,

गोवेन्दह सोरुय गोवेन्दई छय ।

न छि कसरत न यि वहदत लो लो,

अमर पानह छुख व सतचित लो लो ।।

सुख न स्पनस मन्ज़ ति तस जाह युस पराधीन गोवेन्दो ।

न्यबरह कर्यतन खम ति कोताह तिम छि गमगीन गोवेन्दो।