गछि तेलुन पननिस पानस, मेल गोवेन्दह स्यीत भगवानस ।।

संकल्प बासन त्राविथ दिह त समसारई मशिराविथ ।

पुशिराविथ जान जानानस, मेल गोवेन्दह स्यीत भगवानस ।।

सत शब्दस स्योतिय खेलन, मशिराविथ लकय गेलुन ।

येछि मेलुन कस भाग्यवानस, मेल गोवेन्दह स्यीत भगवानस ।।

गुरू शब्द छुय वेमानई, संत तथ प्यठ गयि बफानई ।

कर जानई खस वेमानस, मेल गोवेन्दह स्यीत भगवानस ।।

गुरू शब्दई जानुन रथई गुरूई चलावान अथई ।

न्येर छय वथ प्राव निर्वानस, मेल गोवेन्दह स्यीत भगवानस ।।

छोपि छोपय छोपय छोपय, छोपि हंद्य स्यीतीय नपय ।

पह नपह वुछ तुल ठानस, मेल गोवेन्दह स्यीत भगवानस ।।

फेरन वोथन बेहनई, असन गिन्दन शोंगनई ।

क्षणह क्षणय रोज मंज़ ध्यानस, मेल गोवेन्दह स्यीत भगवानस ।।

सहमसू कोर अनुवई, असिति उदय रोस्तुय रवई ।

परमह शिवय ठ्य पानस, मेल गोवेन्दह स्यीत भगवानस ।।

सत सतगुरू छिय अलोकिखई, रछिन तिमन छिय सीवखई ।

ह्योतहख हय तल दामानस, मेल गोवेन्दह स्यीत भगवानस ।।

येम्य इय वोवुय तस ति बुवुय, तस तथ्य तथ्य धुन छ्य नोवुय ।

तिय मे ख्योवुय लोदनम यि बानस, मेल गोवेन्दह स्यीत भगवानस ।।

तोरुक अनुग्रह गछि बनुन, यस बनि तस क्या छ वनून ।

सीर पनुन भाव म गैरज़ानस मेल गोवेन्दह स्योत भगवानस ।।

बन समन्दर गोबेन्दो, चन समन्दर गोवेन्दो।

वन समन्दर यकसानस, मेल गोवेन्दह स्यीत भगवानस ।।