वुनि वुनि पानो छुख नो ज़ानान

पननुय पान प्रज़नावतो च्य़य

बुय बुय करिथ च़ यथ वान्से

यति नो कांन्से बकारय कान्हें ।।

बोज़खय पैजिई येति लोत लोतुय

सोति सोति स्वराज़े  ईश्वर नाव

यिन भ्रम गछीय यति सोरय म्योनय

सोरय च्य़य तय बुय नो केंन्ह ।।

पानो यति नो कान्ह कान्सि हुन्दुय

नाहकय छयोनुय पननुय पान

यति कुस दियि तय यति कस दिनुय

यति नेरि छोनुय कुनुय पान ।।

कम कम जंग लग्य म्य पननिस पानस

द्रायस जंगि मेंदानस बो

सायि करतम च भगवान पानस

लय कर पननिस ध्यानस मन्ज़ ।।

आंसस बुय तय आसय बुये

सुये छानडान दोह तय रात

छानडान छानडान लोसम लल्ये

सुये बुये केंन्ह नत क्या।।

वन् वन् फीरिथ वन्य दित्यमये

कुनि मा नेरय्म तम्यसुन्द पय

कथ गोय चे अख तय ज़िये

नय छुय सुय तय न छुंस बुये।।

कथ प्यठ गोय च्य़ घर् घरय

परयं सारिनय घर न कांन्ह

घर् घर् करान कात्या मूदीय

नत् कम रूदी घरनय मन्ज़ ॥

आखर सारिनय यति घर् करनुय

घर कउरि कउरि छुय पर् सुन्द माल

थर फिर फिरी कुस दोह छुय बरनुय

स्वरनुय नारायण सुन्द नाव ॥

रोजुन कस तय रोज़ी कूसू

यति नो हय्कान रूजिथ काँह

यिय बुज़िथ छय म्य शरमन्दगी

च्य़ ओसुख तय आसख च्य ।॥

कम्य संदि धर्मय अहम गोलुम

फोलुम बाग तय गोल अहंमभाव

आन्नार व्यञ्नार दम् दम् कउरज़िहे

रुमह रुमह पउरजिहे सूहम सू॥

कति बो आयस कमनू निशे

कम्य हमेशे बोर म्य लोल

यिहंज़ ब आसस तिम ना कुने

म्य हनि हने द्रुतमय वोन ॥

तीर्थ यात्रायन गयस बुये

वुछहान कति छु रोज़ान सू

तति नय सुय तय नय कुनि बुये

वनतम सुये कति आसान ॥

कन दिथ कमला कथताम नये

यति गूव्यन्द गू परान आस्य

तति गूव्यन्द गू परान छिये

त्राविथ सुये बुय न केन्हं ॥

साभार : कमला रैना (चौगाम)