वोन दिथ पननिस पानस

बेयि वुछ दानस दानस

मल तुल आइन् खानस

नोन छुय सुय तय बुय न केन्ह ॥

गाहे गाह म्य पानसीय

गाहे वुछुम सुय त बुय

गाहे सारसीय मंज़ सुय

सोरुय सुय तय बुय न केन्ह़ं ॥

राम पोरुम राम सोरुम

राम कोरुम पंनुनय पान

राम परान ज़गत वुछुम

भगत वुछिम बुय न केन्ह ।।

पाद लूसिम छारान छ़ारान

प्रारान प्रारान दोह तय रात

ओशे कनि खून छस हारान

नारान सुय तय बुय न केन्ह़ ।।

क्या वन् वरन् कस क्या म्य गुदरयोम

रंग रंगय च्नालुन प्योम

नख बोर वालुन प्योम

चालन सुय तय बुय न केन्ह ॥।

यीय वुछुम तीय गोम

दीश न्यबर नेरुन प्योम

अन्द शहरन वोन दिच़ोम

नोन सुय तय बुय न केन्ह॥

वनहा हाल पनुन वंन् कस

बोज़नस लायक छुन् काँह

बोज़खय पोज़य दमय कउरज़िहे

सोरजिहे सुय तय बुय न केन्ह ॥

यस यि बने सु तिय वने

मउनत्र दुये गय दूर

सूर ज़न तस मलिथ तने

वने सुय तय बुय न केन्ह ॥

अज़ताम ज़ाॅय मा पेयस प्रचउय

शचय करान सूरम वान्स

अवल आखर वुछुख म्य च्य़य

सोरय च्यय तय बुय न केन्ह ॥

वुछान वुछान वख गव नीरिथ

पख ब्रोन्ठ कुन बदलयोमुत दुनिया

गोस् कस कम्य सुन्द कुस कस वाति क्या

सीत-सीत सुय तय बुय न केन्ह़ ।।

थकिथ छेनिथ प्येयस वान्से

कान्से हय्कुम न वनिथ केन्ह

यी आम बनिथ तीय गोम सनिथ

नउनिथ सुय तय बुय न केन्ह॥

कउरि कउरि सोरुय रूदम करनय

मुचरन् बरनन्य आयम तउरय

थयर लजिम वुछान वुछान

वुछुम सुय तय बुय न केन्ह ॥

कति ताम आमुत राज़ हंसा अख

येति प्योमुत वारानस मंज़

वुछिथ हौरत हारतस प्योमुत

वुछुम सुय तय वुय न केन्ह ॥

क्या कर क्या कर कोरुन वान्से

कान्सि हुन्दुय छुय न काँह

सोयर त्राविथ सुय पानउ सोरयज़े

पउरज़ये सुय तय बुय न केन्ह ॥

यस यि बने सु तीय वने

सनन् रुस वनि न काँह

कमला पननिस पानस सने

गरि गरि वने बुय न केन्ह ॥

साभार: कमला रैना (चौगाम)