व्यचारुक गाश थावुम निरमल

बु लागय भाव ब्यल मादल

आचारूक होश थावुम निशकल

बु लागय भाव ब्यल मादल ॥

अछन दिम गाश कोठय्न होश पूर

कोरुम वासनाये ज़ालस सूर

वुज़ी आत्म तीर्थ ज़ल

बु लागय भाव ब्यल मादल ॥

गछान नदियन सु जल जारी

यिवान यिम तिम चवान सारी

चथय त्रफती यिवान जल जल

बु लागय भाव ब्यल मादल ॥

पकान छीय ब्रोन्ठ सु अभ्यासीय

घरे द्रामुत सु वनवासी

बरान मस खउसय पुर यमबुरज़ल

बुलागय भाव ब्यल मादल ॥

वजान छय लोलचि तारय

छि बोज़ान नय पय दर पय

न रोज़ि बौछि त्रेश न कान्ह गाँगल

बु लागय भाव ब्यल मादल॥

भ्रमुक परदह ओस यचकाल

तोताम वोल काल सर्पन नाल

वुछम मायज़ाल गयस निर्मल

बु लागय भाव् ब्यल मादल ॥

दैर कोताह माय ज़ालस

कुनी दरह छुस करान बे हय्स

कमन वीरन करन कम छल

बु लागय भाव् ब्यल मादल ॥

छु जिन्दगी हुन्द सफर ज्यूठुय

यिवान छुय ख्योन खोशय म्यूठुय

प्यवान प्यतरुन सु अनि कति भल

बु लागय भाव ब्यल मादल ॥

छु सोरुय जानवुन पानय

यिवान प्रमाद् अझानय

गछान छो पान्य पानय तल

बुलागय भाव ब्यल मादल ॥

करख तफ ज़फ त लारी सुय

बनिथ यूगी चली मनि दुय

छनी अभिलाषणी हान्कल

बु लागय भाव ब्यल मादल ॥

ध्यान् सात्य नाव मन त प्राण

झान गंगाई वस कर श्रान

तिथिस तिर्थस वनय क्या फल

ब लागय भाव ब्यल मादल ॥

बनख निरराग राग त्राविध

मान औमान मुशराविथ

करख सतसंग वापस म चल

बु लागय भाव ब्यल मादल ॥

नचान छी चरसी बन्गी

बनान सारी छि सतसंगी

बनख सतजन छु वाद् अटल

बु लागय भाव ब्यल मादल ॥

यिनय ब्रोन्ह कुन दिनय पामय

छउनय तमि सीत अझान जामय

ननी तनि सूर च पान्य पांनय मल

बु लागय भाव ब्यल मादल ॥

वजान छुय सतकुय सन्तूर

यिमव बूज़ कनव तिमय बहुदूर

छि तिम वारागी निर्मल

बु लागय भाव ब्यल मादल ।।

वजान छस मनचे तारय

वसान छस अशिने दारय

तरान तारय स्यठाह कोमल

ब लागय भाव ब्यल मादल॥

यि भवसर बौड स्यठाह ज़ील डल

हय्सस रोज़ यिन गरछी गांगल

लउयमभि मन्ज़ छुय फोलान कमल

बु लागय भाव ब्यल मादल ॥

साभार: कमला रैना (चौगाम)