मुशकिल चालुन प्योम

सु प्रोन कर्मय लोनये

बुलबुल हय गव नालान

वन्य गुलज़ार म्योनये ॥

वन् कस अन्द्रिम हाल

सनि लगि तस यचकाल

ज़ाल पान् वूनये

वन्य गुलज़ार म्योनये ॥

सोरय सोरय सूर हय गोम

ग्यूर आवलुन ब्रोन्ठ प्योम

सुर हयोतनम छकोनये

वन्य गुलजार म्योनये॥

हाल क्या हाल वुछ म्ये

गव स्यठा यच्काल म्ये

खाल काँसि काँसि जोनये

वन्य गुलज़ार म्योनये॥

लोल नारुक आमताव

वारागन गोन्उ जलाव

हावभाव क्या थयकुनये

वन्य गुलजार म्योनये॥

यन् कनन नाद गोम

तन सोरुय व्यसरयौंम

हस्य पान् खसवोनये

वन्य गुलज़ार म्योनये ।।

गगरायि वुज़मलय

गय पेय सारी कलय

छल गोड वुछवोनये

वन्य गुलज़ार म्योनये ।।

राह मुसाफिर थोक स्यठाह

तम्ची कुनि जाय छा

गम न केन्ह करवोनये

वन्य गुलज़ार म्योनये॥

लूठ गोस लूट् मालसय

राजस कुस निय सालसय

सु आसि वालीय चोनये

वन्य गुलज़ार म्योनये ॥

वनउ कस अन्द्रिम हाल

सनि क्या दिहिच याल त चाल

सु बाल गूपाल म्योनये

वन्य गुलजार म्योनये॥

साभार: कमला रैना (चौगाम)

नय धन नय ध्यांर छिम

नय काया सार छिम

नय असार सार ज़ोनये

वन्य गुलजार म्योनये॥

भवसागर बेकस

त्राव तलवास वस वस

खस अगम दीश कुनये

वन्य गुलज़ार म्योनये ॥

सुलि पानय द्रायस

बेखसमानय गयस

कुस स्थान यति सोनये

वन्य गुलज़ार म्योनये ॥

रावस रावमच ब छस

हारथ वुछिथ हरान गयस

बागि वारान ति चोनये

वन्य गुलज़ार म्योनये॥

वोन कमलायि पानसय

गउरज़ान क्या ज़ानसय

मान अपमान ह्योनये

वन्य गुलज़ार म्योनये ॥

साभार: कमला रैना (चौगाम)