ख्यन् ख्यन् व्यन् तुलसी

ईश्वर पूजि लागय

रंग रंग कोसम ही

सतग्वर शेरि लागय॥

छिय वजान सूहम तार

रातस रोज़ बेदार

ग्वर सय कर ज़ार्  पार

डेडि तल तस बो ज़ागय ॥

आरतिस अर्सर् कास

दासन हुन्द छुय दास

छुस गोमुत च्यथ वोदास

च्यत् पमपोश लागय॥

धर्मस पथ म्य वोनमय

कर्मस मत् वुछतम

वर दिम लोल् मस चोन

प्याल हयथ कति जागय ।।

बाव छुय चोनुय मेय

वाव कास स्यीत स्यीत बेह

दाग छुम जिगरस म्ये

जाग हयथ कति ज़ागय ॥

दोख दोउद गोम सनिथ

ह्येक ना म्य काँसि वनिथ

सहल छा युन बनिथ

ननिथ कथ ज़ायि ज़ागय ।।

बाल् बावस नोन गोम

अन्दकारुक ओन प्योम

बुजरस ओन म्य कासुम

बजरचि ज़ायि ज़ागय ॥

क्रूठ कोताह चालुन

लेन देन मोकलावुन

नख् प्यठ बार वालुन

वनसह कमि तारह ज़ागय ।।

दोहस करान कारोबार

रोज़ान शब बेदार

बोज़ान सूहम् तार

थदि दरबार् ज़ागय ॥

अज़ ज़पा ज़फ म्य करनाव

सूहम सू प्रनाव

अद् तरि भव्सर नाव

ग्राव न सह रोज़ि ज़ागय ।।

हयसउ रोज़ हयस म् रावुस

पान च्यय पुशारावुस

कमला नाव छुय मयोन

दम् दम चे बो ज़ागय

ख्यन् ख्यन् व्यन् तुलसी

ईशवर पूजि लागय ।।

साभारः कमला रैना (चौगाम)